“Тулгуур мэдлэг” гэж нэрлэсэн энэхүү ном нь дунд сургуулийн математикийн хичээлийн үндсэн ойлголтуудыг “Суурь болон бүрэн дунд боловсролын математикийн сургалтын хөтөлбөр”-ийн агуулгад үндэслэн авч үзсэн бөгөөд тэдгээрийн онолын үндсийг тайлбарлаж, жишээ, дасгал, бодлогуудаар бататгасан болно. 

Мөн уг ном нь Соёмбо пресс хэвлэлийн газраас 2012 онд эрхлэн гаргасан “Математик Соёмбо нэвтэрхий толь”, 2015 онд гаргасан “Математикийн тулгуур лавлах”, түүнээс гадна уг тулгуур сурах бичгийн үргэлжлэл болох, удахгүй хэвлэгдэн гарах “Бодлогын хураамж” зэрэг ном, гарын авлагатай нэг багцад орох юм. 

“Тулгуур мэдлэг” ном нь нийт 13 бүлэгтэй. Бүлгүүд ижил бүтэцтэй. Бүлгийн эхэнд тухайн бүлгийн үндсэн ухагдахууны тодорхойлолт, үндсэн элементүүдийн шинж чанар, теоремууд, тэдгээрийн баталгаа орсон. Дараа нь тэдгээр онолын мэдлэгийг бататгах зорилго бүхий жишээ, бодлого, дасгалуудыг бодолт, заавар, зөвлөмжтэйгөөр оруулав. Бүлгийн төгсгөлд бие дааж бодох бодлого, дасгалуудыг хариунуудын хамт багтаасан. Сурах бичгийг аль ч бүлгээс сонгон судалж болох боловч дараах бүдүүвчийн дагуу явбал агуулгын хувьд арай илүү логик дэс дараалалтай байх болно. Үүнд:

II → III → IV

V → VI→ VII → I

X → XIII

VIII → IX

XI

XII

Дасгал, бодлогуудыг хөнгөнөөс хүнд рүү шилжих зарчмаар оруулсан. Түвшний хувьд элсэлтийн ерөнхий шалгалтаас эхлээд дүн шинжилгээ хийх, хүндэвтэр бодлогууд, зарим практик хэрэглээний загварын бодлого, даалгаврууд багтсан. Тухайлбал, 6 дугаар бүлэг (Функц, түүний чанар. График)-ийн төгсгөлд Европын холбоо, ХБНГУ-ын ахлах сургуулийн математик сургалтын хөтөлбөрийн хүрээнд авч үздэг практик бодлого, дасгалуудтай ижил төстэй сонирхолтой даалгавруудыг оруулж өгсөн. Энэ нь суралцагчид математикийн хичээлээр олж авсан онолын мэдлэгээ практикт хэрэглэхэд тус дөхөм болох юм.

Уг номыг боловсруулахдаа математикийн сурах бичиг, гарын авлагын агуулга, арга зүйн орчин үеийн чиг хандлагыг аль болох тусгахыг хичээж, боломжтой хэсгүүдэд компьютерийн хэрэглээний болон тусгай программуудыг ашиглав. Тухайлбал, математик загварчлалын хэсэгт системийн динамикийн загварчлалын Vensim программ, олон гишүүнт, Горнерийн схем, комбинаторик, магадлал, статистик сэдвүүдийн хүрээнд Microsoft Excel, математик статистикийн үнэлгээ, үр дүнгийн боловсруулалтад SPSS программуудын дэмжлэг авсан.

Номд ЭЕШ, суурь болон бүрэн дунд сургуулийн математикийн хичээлийн төгсөлтийн шалгалтууд, мөн багш, бэлтгэдэг их, дээд сургуулийн математикийн курс хичээлүүдэд түгээмэл хэрэглэгддэг математик тэмдэглэгээнүүд орсноос гадна гадаад улс орнуудын их, дээд сургууль, коллежийн элсэлтийн шалгалтын материалд ашиглагддаг зарим онцлог тэмдэглэгээнүүд байгаа. Тухайлбал, 10 дугаар бүлэг (Тригонометр)-ийн тангенс, котангенс функцийг АНУ, Япон, БНСУ, Сингапур зэрэг улс орнуудын математикийн сурах бичиг, гарын авлагуудад , гэж тэмдэглэсэн байдаг. Монгол, ОХУ, ХБНГУ зэрэг улсад өнцгийн тангенс функцийг , 

котангенс функцийг гэж тэмдэглэдэг. Компьютерийн программ дээр косеканс функцийг csc гэж тэмдэглэсэн байдаг. Тэдгээрийг яг тэр хэлбэрээр нь оруулсан.

Уг номыг ерөнхий боловсролын сургуулийн 6-12 дугаар ангийн сурагчид, эдгээр ангиудад математикийн хичээл зааж буй багш нар болон элсэлтийн ерөнхий шалгалтад бэлтгэгчид, их дээд сургуульд элсэгчид, математикийн хичээлийг системтэйгээр судлахыг зорьсон хэн бүхэн сонирхон судлах боломжтой.